Իսրայելի բանակը հարվածներ է հասցրել ՀԱՄԱՍ-ի «Ալ Ղասամ» զինյալ թևի հրամանատարի տան վրա ՝ սպանելով նրա հորը, եղբորը, երեխաներին և այլ հարազատների
Իսրայելի բանակը հարձակում է գործել պաղեստինյան ՀԱՄԱՍ արմատական շարժման «Ալ Ղասամ» զինյալ թևի հրամանատար Մուհամմեդ Ադ-Դեյֆի տան վրա՝ սպանելով նրա հորը, եղբորը, երեխաներին և այլ հարազատների. հրամանատարի ճակատագրի մասին չի հաղորդվում:Այս մասին հայտնել է Al Mayadeen հեռուստաալիքը։
Նշվում է, որ տեղեկություններ չկան այն մասին, թե արդյոք Իզ էդ-Դին ալ-Քասամ բրիգադների ղեկավարը եղե՞լ է շենքում դրա ոչնչացման պահին։
Դեյֆի վիճակի մասին ՀԱՄԱՍ-ը տեղեկատվություն չի տրամադրում։
Իսրայելցիները վերջինիս համարում են գլխավոր ահաբեկիչներից մեկը, պաղեստինցիները՝ ժողովրդի ազատության լեգենդար մարտիկ: Իսրայելի ուժայինները մի քանի անգամ փորձել են նրան ոչնչացնել, նա բազմաթիվ վնասվածքներ է ստացել, կորցրել՝ աչքն ու թևը, սակայն ամեն անգամ ողջ է մնացել:
Մեկ օր առաջ Իսրայելի պաշտպանության բանակը հայտարարել էր Գազայում ՀԱՄԱՍ-ի երկու բարձրաստիճան անդամների՝ Ջավադ Աբու Շամալայի և Զաքարիա Աբու Մաամրի լիկվիդացման մասին։ Իսրայելական բանակի մամուլի ծառայության պաշտոնական հայտարարություններից կարճ ժամանակ անց ՀԱՄԱՍ շարժումը հաստատել էր իր հրամանատարների մահը։
