Հայաստանն այժմ այն վիճակում չէ, որ նրա հետ սակարկեն, ոչ ոք չի սակարկի...Իսկ Բաքուն ու Անկարան կփորձեն ուղիղ ճանապարհ կառուցել Սյունիքով
Ադրբեջանի հաջորդ նպատակը Սյունիքն է։ Այս մասին NEWS.am-ի թղթակցի հետ զրույցում ասել է ռուս պատմաբան Մոդեստ Կոլերովը։«Սյունիքի անշլյուսի միջոցները կարող են տարբեր լինել։ Մինչ վերջին իրադարձությունները Սյունիքի բնակչությունն արդեն 43 հազարից նվազել էր 7 հազարի։ Այժմ այնտեղ մի շարք փախստականներ են տեղավորվել։ Բայց նրանք կբնակվեն տարբեր վայրերում, ուստի շրջանին դեպոպուլյացիա է սպառնում»,-նշել է նա։
Ըստ Կոլերովի՝ դեպոպուլյացիան էլ հենց կլինի անշլյուսի միջոցը։
Ինչ վերաբերում է Բաքվի հայտարարություններին, թե իրենք պատրաստ են կապ հաստատել Ադրբեջանի և Նախիջևանի միջև նաև Իրանի միջոցով, ապա, ըստ պատմաբանի, այդ կապն արդեն կառուցվում է։
Սյունիքի առնչությամբ խոսքը կոնկրետ վերահսկողության մասին է՝ անկախ նրա պաշտոնական կարգավիճակից, պարզաբանել է Կոլերովը։
«Իրանով անցնող միջանցքն ամեն դեպքում կկառուցվի, բայց դա կունենա տեխնիկական բնույթ։ Իսկ Բաքուն ու Անկարան կփորձեն ուղիղ ճանապարհ կառուցել Սյունիքով»,-ընդգծել է պատմաբանը։
Անկլավները, չնայած իրենց կարևորությանը, այնուամենայնիվ, մանր, անսկզբունքային, տեխնիկական հարց է, և ոչ ոք դրանց շուրջ չի սակարկի։
«Հայաստանն այժմ այն վիճակում չէ, որ նրա հետ սակարկեն։ Նրա հետ ոչ ոք չի սակարկի»,-հավելել է նա:
Ինչ վերաբերում է Ռուսաստանին, ապա այն ֆիքսել է Կովկասում իր պատասխանատվության տարածքը, ռուս խաղաղապահների ներկայությունը կրճատվում է, նրանք գնալու են։
«Անդրկովկասում Ռուսաստանի պատասխանատվության տարածքը կսահմանափակվի Աբխազիայով և Հարավային Օսիայով»,-ասել է Կոլերովը։
Ըստ պատմաբանի, Իրանի ուշադրությունը Կովկասի նկատմամբ չի թուլանա՝ չնայած Մերձավոր Արևելքի իրավիճակին։
«Իրանի հյուսիսային սահմանի խնդիրը կմնա ամբողջությամբ նրա իրավասության ներքո, և ոչ մի Ֆրանսիա ոչնչով չի օգնի»,-եզրափակել է նա։
