Պետպատվերով բուժման գումարի տրամադրման կարգը փոխվում է
ՀՀ առողջապահության նախարարությունը փոխելու է պետպատվերի գումարի տրամադրման համար բժշկական կազմակերպությունների հետ պայմանագրերի կնքման տրամաբանությունը: Հնարավոր է, որ այդ պայմանագրերը կնքվեն մեկ տարուց կարճ ժամկետով և պարբերաբար վերանայվեն, ասել է նախարարի պաշտոնակատար Արսեն Թորոսյանը՝ ԱԺ-ում 2019 թ. պետական բյուջեի նախագծի քննարկմանը:
«Պետպատվերի գումարների տրամադրման պայմանագրերը բժշկական կազմակերպությունների հետ կնքվում են տարվա սկզբին՝ տարբեր սկզբունքների հիման վրա: Մինչ այժմ գործող սկզբունքը եղել է նախորդ տարվա եղած գումարի չափը: Սակայն մենք պայմանագրերի կնքման տրամաբանությունը փոխելու ենք: Վճարովի ծառայությունների թիվն ուղղակի ցուցիչ է բժշկական կազմակերպության արդյունավետության և որակի: Բժշկական կազմակերպություններն անհավասար պայմաններ չեն ունենալու պետական միջոցներից օգտվելու հարցում: Հնարավոր է, որ նույնիսկ պայմանագրերը կնքվեն ոչ թե մեկ տարով, այլ ավելի կարճ ժամկետով»,-ասաց Թորոսյանը:
Նա նշեց, որ այդ պայմանագրերը կարող են վերանայվել, իհարկե, բայց մի քանի ծառայությունների գծով՝սոցիալապես անապահով անձանց մատուցվող ծառայությունների ու զինծառայողներին մատուցվող ծառայությունների:
Մարզային բուժհաստատությունների դեպքում տրվող միջոցների չափը պայմանավորված է լինելու սպասարկվող բնակչության թվի, նաև նախորդ տարի արձանագրված դեպքերի հետ: Նախարարի պաշտոնակատարը նշեց, որ արդեն որոշակի վերաբաշխումներ են արել, շատ միջոցներ ուղղել են դեպի մարզեր:
Նա նկատեց՝ բուժհաստատություններին պետպատվերի համար գումար տրամադրելու մեխանիզմը կփոխվի, եթե անցում կատարենք ապահովագրական համակարգին:
