Արցախը դիտել որպես պրոբլեմ, նշանակում է կապիտուլիացիայի ձեռք մեկնել Բաքվին. Գեղամ Նազարյանը՝ Արամ Մանուկյանի հայտարարության մասին

Նման տեքստերի հանդիպում ես մեկ էլ haggin.az- ում, ադրբեջանցի պաշտոնյաների կողմից արտաբերված։
Հայ մարդն ո՞ւր պետք է հասնի, որ լեզուն պտտվի ու Արցախը պրոբլեմ համարի: Ո՞րն է պրոբլեմը՝ խաղաղ կյանքը, երեսուն տարվա ազատագրված Արցախը, տարեց տարի աճող տուրիստական հոսքերը դեպի Ղարաբաղ, ծնվող երեխաները, տեղական աճող արտադրությունները, շքեղ քաղաքներն ու գյուղերը, թե՞ ողջ հայության հավաքատեղի դարձած համահայկական խաղերը Ստեփանակերտում։
Գուցե Արամ Մանուկյանը նկատի ուներ, որ Արցախի խնդրի լուծումը նոր զարգացման խթան կհանդիսանա։ Բայց սա նույնպես հստակեցման կարիք ունի։ Խնդրի լուծումը Արցախի անկախությունն է ու անվտանգության լիակատար ապահովումը։ Հետևաբար այս պահին խնդրի լուծումն անհնար է։ Խնդրի լուծումը միայն մեզնից չի կախված, այլ նա և Բաքվից: Ստացվում է, որ Արցախը ոչ թե պրոբլեմ է, այլ ազգային մոտիվացիա, ազգային կոնսոլիդացիա ապահովող հարց, այս և առաջիկա սերունդների առաքելությունը։
Արցախը դիտել որպես պրոբլեմ, նշանակում է կապիտուլիացիայի ձեռք մեկնել Բաքվին։
Հայաստանի ոչ մի խնդիր անլուծելի չէ, ոչ Ամուլսարը, ոչ տնտեսական զարգացումը, ոչ արտագաղթը։ Բայց դրա համար կա մի պայման. մերժել, ընդմիշտ մերժել արամմանուկյանատիպ մտածողությունը։ Ցանկացած միակողմանի զիջում, Հայաստանը Կովկասում դարձնելու է անպետք տարածք, եթե կուզեք՝ Թուրքիայի կոմերցիոն ֆիլիալը։
Գեղամ Նազարյան
«Այլընտրանքային նախագծեր խումբ»