Ուրալում ուժեղացվել է հսկողությունը Հայաստանից ժամանածների նկատմամբ՝ հայտնաբերվել է սիբիրախտի երկու օջախ
Եկատերինբուրգի «Կոլցովո» միջազգային օդանավակայանում ուժեղացվել է սանիտարակարանտինային հսկողությունը Հայաստանից Սվերդլովսկի մարզ ժամանող տրանսպորտային միջոցների և ուղևորների նկատմամբ` հանրապետությունում սիբիրախտի օջախների գրանցման հետ կապված, հայտնում է oblgazeta.ru-ն:«Ռոսսելխոզնադզոր»-ի մամուլի ծառայությունը հաղորդագրություն է տարածել, որում նշել է այն մարզերի անունները, որտեղ հիվանդության օջախներ են հայտնաբերվել:
«Հայաստանի Հանրապետության Մարտունու շրջանի Գեղհովիտ և Արմավիրի մարզի Գետաշեն գյուղերի բնակիչների շրջանում հայտնաբերվել է սիբիրախտի երկու օջախ՝ ընդհանուր 13 հիվանդացության դեպքով»,-ասված է հայտարարության մեջ:
Նշվում է նաև, որ հիվանդներից մեկը հայտնաբերվել է Ռուսաստանում:
Հիվանդի խոսքերով, նա մասնակցել է Գետաշեն գյուղում մասնավոր անձից ձեռք բերված մսի բաժանմանը: Ասվում է, որ այսօրվա դրությամբ բժշկական հսկողության ներքո է գտնվում 60 մարդ, ովքեր ինչ-որ կերպ շփում են ունեցել հիվանդների հետ։
