Սահակաշվիլին շատ բարկացած է Ղարիբաշվիլիի վրա, ասել է որ նրան «դուրս է շպրտելու» կաբինետից
Վրաստանի նախկին նախագահ Միխեիլ Սահակաշվիլին, որն այժմ վրացական բանտում է, սպառնացել է, որ կհասնի երկրի վարչապետ Իրակլի Ղարիբաշվիլիի և պետական այլ պաշտոնյաների հրաժարականին. հայտնում է Sputnik-ի վրացական ծառայությունը: Նա համապատասխան ուղերձը փոխանցել է իր կողմնակիցներին Ռուսթավիի բանտից:Նամակում նախկին նախագահը խոստացել է իր հիմնած «Միացյալ ազգային շարժում» կուսակցության նախագահ Նիկանոր Մելիայի և վրաց ժողովրդի հետ Ղարիբաշվիլիին «դուրս շպրտել» կաբինետից:
«Ես և Մելիան ենք լինելու նրանք, ովքեր վրաց ժողովրդի հետ վռնդելու են Ղարիբաշվիլիին իր գրասենյակից»,- վստահեցրել է նա:
Սահակաշվիլին շատ բարկացած է Ղարիբաշվիլիի վրա, որն ավելի վաղ կասկածել էր, որ նախկին նախագահն իրոք սովամահ է լինում բանտում՝ հայտարարելով, որ Սահակաշվիլին օրական մի քանի լիտր մեղր է ուտում ու բնական հյութ խմում:
Ղարիբաշվիլին նաև բացառել է Սահակաշվիլիին Ուկրաինային արտահանձնելու հնարավորությունը:
