Չեռնոբիլի ԱԷԿ-ում ճառագայթման արտահոսքի վտանգ կա․ Ուկրաինայի ԱԳ նախարար
Առաջիկա օրերին հոսանքազրկված Չեռնոբիլի ատոմակայան էլեկտրաէներգիա կմատակարարվի պահեստային գեներատորներից, սակայն հետո կդադարեցվի օգտագործված միջուկային վառելիքի պահեստավորման հովացման համակարգը, ինչը կարող է ճառագայթման արտահոսքի պատճառ դառնալ։ Այդ մասին հայտարարել է Ուկրաինայի արտգործնախարար Դմիտրո Կուլեբան։«Վնասվել է Չեռնոբիլի ատոմակայանի և ռուսական բանակի վերահսկողության տակ անցած միջուկային օբյեկտների միասնական էլեկտրամատակարարման գիծը։ Չեռնոբիլի ատոմակայանը հոսանքազրկված է»,- նշել է Կուլեբան։ Նա զգուշացրել է, որ դիզելային գեներատորները կարող են աշխատել 48 ժամ։
Ավելի վաղ Ռուսաստանի պաշտպանության նախարարի առաջին տեղակալ Նիկոլայ Պանկովը հայտարարել էր, որ Ուկրաինայի զինված ուժերը հարվածներ են հասցրել Չեռնոբիլի ատոմակայանը սնուցող ենթակայանին և էլեկտրահաղորդման գծերին։ Նա ասել էր, որ Ռուսաստանի և Բելառուսի միջև պայմանավորվածություն է ձեռք բերվել ատոմակայանի մշտական սխեմայով էլեկտրամատակարարումը վերականգնելու վերաբերյալ։
