ՌԴ-ն չի կարողանում ապահովել կայունությունը.բոլոր նախանշանները կան պնդելու, որ Ադրբեջանը հերթական ռազմական սադրանքն է պատրաստում, այդ թվում՝ Լեռնային Ղարաբաղում
Եթե Ռուսաստանն օբյեկտիվ կամ սուբյեկտիվ պատճառներով չի կարողանում ապահովել կայունությունն ու անվտանգությունը Լեռնային Ղարաբաղում, ապա հենց ինքը պետք է քննարկում նախաձեռնի ՄԱԿ-ի ԱԽ նիստում ու ԼՂ-ում ռուս խաղաղապաներին ՄԱԿ-ի ԱԽ մանդատով օժտելու կամ ԼՂ լրացուցիչ բազմազգ խաղաղապահ զորախումբ ուղարկելու հարց բարձրացնի: Այս մասին Կառավարության նիստի ժամանակ հայտարարել է վարչապետ Նիկոլ Փաշինյանը.«Նման հարցադրում ծագում է նաև այն պատճառով, որ Լաչինի միջանցքի փակումը Ադրբեջանի կողմից ԼՂ-ում ռուս խաղաղապահների պատասխանատվության գոտի ներխուժելու առաջին դեպքը չէ, սրան նախորդել են Փառուխի և Խծաբերդի իրադարձությունները, որի հետևանքով շուրջ 3 տասնյակ քաղաքացիներ մնում են գերեվարված »,- ասաց Փաշինյանը:
Նա հայտարարեց, որ բոլոր նախանշանները կան պնդելու, որ Ադրբեջանը հերթական ռազմական սադրանքն է պատրաստում, այդ թվում՝ Լեռնային Ղարաբաղում.
«Պետք է անկեղծ ասեմ, որ Հայաստանի Հանրապետությունը ԼՂ-ում ռուս խաղաղապահների ներկայութան համոզված կողմնակիցն է ու այդ ներկայության ջատագովը, բայց մեզ համար անընդունելի է ԼՂ հայաթափման լուռ վկա դառնալու ռուս խաղաղապահների ավելի ու ավելի տեսանելի դարձող գործելակերպը։ Ամեն դեպքում, մենք այս հարցերի պարզաբանման շուրջ պետք է սերտորեն աշխատենք ՌԴ ու մյուս միջազգային գործընկերների հետ՝ իրադրության հետագա սրում թույլ չտալու ու համապարփակ կարգավորումների հասնելու համար»,- ասաց Նիկոլ Փաշինյանը:
Լաչինի միջանցքը փակվել է Ադրբեջանի կողմից, և դա նրա միջազգային պարտավորության կոպտագույն խախտում է։ Իրավիճակի հստակ պարզաբանմամբ պետք է հանդես գա ՌԴ խաղաղապահ զորախումբը և ՌԴ-ն, որը անվտանգային կոնկրետ պարտավորություններ է ստանձնել ԼՂ ժողովրդի առաջ։
«Ո՞րն է իրադրության՝ ՌԴ գնահատականը, ո՞րն է Լաչինի միջանցքը վերականգնելու նրա պլանն ու ճանապարհային քարտեզը. սրանք հարցեր են, որոնց պատասխանին ՀՀ ու ԼՂ հանրությունը սպասում է ՌԴ-ից, որը նաև ՄԱԿ-ի ԱԽ մշտական անդամ է։
Նիկոլ Փաշինյանն ասաց, որ գործընկեր պետությունները, միջազգային կազմակերպությունները պետք է լավ տեղեկացված լինեն ԼՂ-ում ստեղծված հումանիտար իրավիճակի վատթարացման մասին։
Վարչապետը նաև նշեց, որ չզեկուցվող հարցերի փաթեթում ընդգրկված է նաև ԼՂ-ին 4 մլրդ դրամ լրացուցիչ աջակցություն տրամադրելու հարցը։
