Ֆելիքս Ցոլակյանը Կոռուպցիայի կանխարգելման հանձնաժողովի նախագա՞հ
Օրեր առաջ ՀՀ Ազգային ժողովն առաջին ընթերցմամբ միաձայն ընդունեց «Կոռուպցիայի կանխարգելման հանձնաժողովի մասին» և հարակից օրենքների նախագծերի փաթեթը: Օրենսդրական նախաձեռնությանը միաձայն կողմ քվեարկեց 87 պատգամավոր: Հանձնաժողովն իրավասու է քննարկել և վարույթ ընդունել բարձրաստիճան պաշտոնատար անձանց էթիկայի և շահերի բախման հարցերը, կիրառել վարչական պատասխանատվություն, իսկ առերևույթ հանցագործության հատկանիշների առկայություն հայտնաբերելու դեպքում տվյալները պետք է տրամադրել գլխավոր դատախազությանը:
Որքան էլ ընդդիմադիրները պատշաճ և նպատակահարմար են համարում նորաստեղծ հանձնաժողովի իրենց կողմից ղեկավարումը, այնուամենայնիվ, Hayacq.com-ի տեղեկություններով այն ստեղծվում է «հատուկ Ֆելիքս Ցոլակյանին հանձնաժողովի նախագահի հաստիքով ապահովելու համար»։
Տեղեկության իսկությունը ճշտելու նպատակով մեկնաբանություն խնդրեցինք Ցոլակյանից, ով մեր հարցին ի պատասխան ասաց.
«Վա~յ, վա~յ, վա~յ... Առաջին անգամ էդ մասին ձեզանից եմ լսում»,- ապա հավելեց,- «Նման բան չկա»: Ճշտող հարցին, թե այդ դեպքում ինչո՞ւ ազատվեց Նախագահի վերահսկողության ծառայության ղեկավարի պաշտոնից` միայն հանուն պատգամավորությա՞ն, վերջինս պատասխանեց.
«Դրա մասին ես մամուլում բազում հրապարակումներ եմ արել, թույլ տվեք նորից չանդրադառնալ»:
Եվ որքան էլ Ցոլակյանը հերքեց մեր տեղեկությունները, հաշվի առնելով ոչ միայն այն հանգամանքը, որ նա կարկառուն ՀՀԿ-ական է, որ մարզպետի նրա գործունեությունից հարազատ կուսակցությունում դժգոհություններ չկան, այնուհանդերձ, իրազեկ աղբյուրի փոխանցմամբ՝ «հանձնաժողովի նախագահի նրա թեկնածությունն առաջադրելու է անձամբ Սերժ Սարգսյանը՝ ի նշան վստահության և ուսանողական, հանրակացարանային ընկերության»:
Իսկ հանձնաժողովի անդամները պետք է ընտրվեն խորհրդարանի պատգամավորների թվի ձայների մեծամասնությամբ: Հանձնաժողովի անդամ առաջադրելու համար պետք է ձևավորվի մրցութային խորհուրդ, որի անդամներին ներկայացնելու են բարձրագույն դատական խորհուրդը, մարդու իրավունքների պաշտպանը, փաստաբանների պալատը, Սահմանադրական դատարանի նախագահը և հանրային խորհուրդը, որի համար պարտադիր պահանջ է՝ ներկայացնել քաղաքացիական հասարակության ներկայացուցիչ: Մրցութային խորհուրդը բաց ընթացակարգով թեստավորելու և կազմակերպելու է թեկնածուների առաջադրումը:
Հավելենք, որ Շիրակի նախկին մարզպետ, Նախագահի վերահսկողության ծառայության նախկին ղեկավար, գեներալ-լեյտենանտ Ֆելիքս Ցոլակյանը, ՀՀ 6-րդ գումարման ազգային ժողովի պատգամավոր դարձավ
վարկանիշային ընտրակարգով, թիվ 11 ընտրատարածքից՝ ստանալով 11 հազար 796 վստահության քվե:
