«Ես ոչ մի տեղ չեմ գնա, և ես ձեր վերջը կտամ». Վրաստանի վարչապետի պաշտոնի թեկնածու
Վրաստանի վարչապետի պաշտոնի թեկնածու Գեորգի Գախարիան «Միասնական ազգային շարժում» նախկին կառավարող կուսակցությանը մեղադրել է ստելու մեջ եւ խոստացել է վերջ տալ նրան։Ընդդիմությունը եւ մի խումբ երիտասարդներ, որոնք ավելի քան երկու ամիս պահանջում Էին Գախարիայի հրաժարականը ՆԳ նախարարության ղեկավարի պաշտոնից, վրդովված են, որ հենց նրան են առաջադրել վարչապետի պաշտոնում:
«Ազգային շարժումից» պատգամավորները, որոնց հետ սեպտեմբերի 6-ին հանդիպել են կառավարության ապագա անդամները, Գախարիային անվանել են հանցագործ, որի տեղը բանտն է: «Ես ոչ մի տեղ չեմ գնա, եւ ես ձեր վերջը կտամ, եւ ձեր վերջը կտա վրաց բնակչությունը եւ Վրաստանի ընտրողները: Դուք սովորական փողոցային ընդդիմություն եք եւ 2020 թվականին մնալու եք փողոցում»,-հայտարարել է Գախարիան խորհրդարանի ամբիոնից:
Ընդդիմադիրները պահանջում էին, որ Գախարիան թույլ տա երիտասարդ ակտիվիստներին եւ այն աղջկան, որը մի աչքը կորցրեց հունիսի 20-21-ին խորհրդարանի առջեւ բողոքի ակցիայի ցրման ընթացքում, մտնել նիստերի դահլիճ եւ հարցեր տալ նրան: Գախարիայի հայտարարությունից հետո ընդդիմադիր պատգամավորները ցուցադրաբար լքել են նիստերի դահլիճը:
«Ես կարծում եմ, որ այն, ինչ տեղի է ունենում այսօր, այն բանի դրսեւորումն է, թե ինչպես է ճշմարտությունը հաղթում ստին, եւ մեր նպատակն է՝ ամեն օր մերկացնել այդ մարդկանց. այլ ճանապարհ չունենք»,-ասել է Գախարիան, հաղորդել է Sputnik-ը:
