Ղարաբաղի օդային տարածքը դե յուրե Ադրբեջանի վերահսկողության տակ է և շահագործումը բացառված է
Արցախի չճանաչված պետության ղեկավարները փորձում են ամեն ինչ անել իրավիճակը շտկելու համար։ Բայց, եթե սառը դատենք, ապա ԵԱՀԿ համանախագահներին ուղղված Արցախի Հանրապետության ԱԺ նախագահ Արթուր Թովմասյանի կոչը, կարող է անարձագանք մնալ, որովհետև դիմել ՄԻՆՍԿ-ի խմբի համանախագահող երկրներին, որտեղ Ֆրանսիան է, Ռուսաստանը և ԱՄՆ-ն, իհարկե անիմաստ է արդյունքներ սպասել։ Նախ` այդ ձևաչափը գոյություն չունի, և երկրորդ` ինչպե՞ս կարող են այդ համանախագահները համատեղ քայլեր ձեռնարկել այն դեպքում, երբ եռանախագահության երկու երկիր մեկը մյուսի հետ բացահայտ պատերազմի մեջ են Ուկրաինայում, հետևաբար, տրամաբանական չէ, որ ԵԱՀԿ-ն կարող է ինչ-որ բան անել Բերձորի միջանցքը բացելու ուղղությամբ։ «Փաստինֆո»-ի հետ զրույցում նման կարծիք հայտնեց քաղաքագետ Գարիկ Քեռյանը։Ստեփանակերի օդանավակայանը գործարկելու հավանականությունը ևս, ըստ քաղաքագետի, ֆանտաստիկայի ժանրից է։ Տարիներ առաջ վերակառուցված ու անհրաժեշտ սարքավորումներով հագեցված օդանավակայանը հիմա, առավել քան երբևէ, հնարավոր չէ շահագործել, քանի որ դա հակասում է օդային տարածքի օգտագործման միջազգային իրավունքին։
«Ղարաբաղի օդային տարածքը դե յուրե Ադրբեջանի վերահսկողության տակ է և եթե Ադրբեջանը այդ օդանավակայանը օգտագործելու համաձայնություն տա, դա ինչ-որ տեղ նշանակում է` ճանաչել Արցախի իշխանություններին, կամ նրանց գործառույթները, մինչդեռ այս ամբողջ ճգնաժամի պատճառն այն է, որ Արցախում չլինեն հայկական ուժեր և հայկական ադմինիստրացիա։ Բնականաբար բացառված է, որ Ադրբեջանը թույլ տա Ստեփանակերտի օդանավակայանի շահագործումը Արցախի հայկական ադմինիստրացիայի կողմից»,- նշեց Քեռյանը։
Նշենք, որ Արցախի ԱԺ նախագահ Արթուր Թովմասյանը այսօր կոչով դիմել էր ԵԱՀԿ Մինսկի խմբի համանախագահող երկրների առաջնորդներին և քաղաքակիրթ աշխարհին, հորդորելով` կոնկրետ գործողություններ կիրառել Բերձորի միջանցքի բացման կամ օդային կամրջի՝ Ստեփանակերտի օդանավակայանի գործարկման ուղղությամբ, ինչը թույլ կտա ձմեռային ժամանակաշրջանում փոքր-ինչ կանխելու Արցախում առկա հումանիտար տագնապալի ճգնաժամը։
Հիշեցնենք, որ դեկտեմբերի 12-ից առ այսօր Շուշի-Քարին տակ խաչմերուկի հատվածում մի խումբ ադրբեջանցի «բնապահպաններ» փակել են Հայաստանն Արցախին կապող միակ` Գորիս-Ստեփանակերտ ճանապարհը, ինչի հետևանքով Արցախը հայտնվել է շրջափակման մեջ, իսկ Հայաստանում գտնվող արցախահայերը չեն կարողանում գնալ իրենց տները։
