Բայդենի վարչակազմը պլաններ է մշակում Գազայի հատվածում պատերազմի հնարավոր՝ ավելի լայն մերձավորարևելյան հակամարտության վերածվելու դեպքում ԱՄՆ պատասխանի համար
Նախագահ Բայդենի վարչակազմը պլաններ է մշակում Գազայի հատվածում պատերազմի հնարավոր՝ ավելի լայն մերձավորարևելյան հակամարտության վերածվելու դեպքում ԱՄՆ պատասխանի համար, գրում է Politico-ն։Ըստ քննարկումներին անմիջականորեն տեղյակ ամերիկացի երեք պաշտոնյաների՝ զինվորականները պլաններ են մշակում հակահարված տալու Իրանի կողմից աջակցվող հութի զինյալներին, որոնք հարձակումներ են գործել Կարմիր ծովում առևտրային նավերի վրա:
Միևնույն ժամանակ, հետախուզության աշխատակիցները մտածում են, թե ինչպես հետ մղել Իրաքում և Սիրիայում Իրանի կողմից աջակցվող ուժերի կողմից ԱՄՆ-ի վրա հնարավոր հարձակումները: Աշխատանքներ են տարվում նաև պարզելու, թե որտեղ կարող են հաջորդ հարվածը հասցնել հութի գրոհայինները:
Ամիսներ շարունակ ԱՄՆ-ը կուլիսների հետևում հորդորում է Թեհրանին համոզել իր կողմնակիցներին սահմանափակել հարձակումները: Սակայն պաշտոնյաներն ասում են, որ հարձակումների նվազման նշաններ չեն տեսնում՝ մտավախություն ունենալով, որ դրանք առաջիկա օրերին միայն կավելանան:
Դա սրացում է, որը կարող է ավելի խորը ներքաշել նախագահ Ջո Բայդենին Մերձավոր Արևելքում, հենց այն ժամանակ, երբ 2024 թվականի քարոզարշավի սեզոնը թեժանում է և մղում է նրա արշավը կենտրոնանալ ներքին խնդիրների վրա:
Ավելի լայն հակամարտությունների հավանականությունն աճում է Իրաքում, Լիբանանում և Իրանում վերջին մի քանի օրվա ընթացքում տեղի ունեցած մի շարք բախումներից հետո, ասում են պաշտոնյաները: Դա համոզեց վարչակազմի որոշ պաշտոնյաների, որ Գազայի պատերազմը պաշտոնապես տարածվել է գոտու սահմաններից դուրս, մի սցենար, որից ԱՄՆ-ն ամիսներ շարունակ փորձում էր խուսափել:
Զարգացումը վտանգ է ներկայացնում ոչ միայն տարածաշրջանային անվտանգությանը, այլև Բայդենի վերընտրվելու հնարավորություններին։ Նա ստանձնեց պաշտոնը՝ խոստանալով վերջ տալ պատերազմներին:
