Ռուս-ուկրաինական պատերազմի սկզբից 2500 գիտնական լքել է Ռուսաստանը. նրանց ընդունողների թվում է նաև Հայաստանը
Ռուս-ուկրաինական լայնամասշտաբ պատերազմի սկզբից ի վեր առնվազն 2500 գիտնական խզել է գիտական կապերը Ռուսաստանի հետ և լքել երկիրը։ Այս մասին ասվում է Новая газета Европа-ի ուսումնասիրության մեջ։Հաշվարկի համար լրագրողներն օգտագործել են միջազգային ORCID տվյալների բազայի տեղեկատվությունը, որը ստեղծվել է 2012 թվականին՝ գիտնականներին նույնականացնելու համար: Այն համախմբում է տեղեկատվություն աշխարհի ավելի քան 20 միլիոն հետազոտողների մասին: 2023 թվականի հոկտեմբերի դրությամբ ORCID-ում գրանցվել է ավելի քան 130 հազար գիտնական, ովքեր նշել են Ռուսաստանի հետ կապված առնվազն մեկ աշխատանքի վայր։
Ըստ հետազոտության հեղինակների՝ 2012 թվականից մինչև 2021 թվականը գիտական աշխատողների մասնաբաժինը, ովքեր փոխել են իրենց պատկանելությունը ռուսականից օտարերկրյա, գրեթե անփոփոխ է մնացել՝ 10%, սակայն 2022 թվականին ORCID-ում գրանցված գիտնականների 30%-ը Ռուսաստանից արտասահման է տեղափոխվել:
«Այսինքն՝ 2022 թվականից ի վեր ավելի քան 600 գիտնական լքել է Ռուսաստանը, իսկ արտասահմանում իրենց հաջորդ աշխատանքը ընտրողների մասնաբաժինը եռապատկվել է»,- ասվում է հոդվածում։ Այս դեպքում ORCID-ի օգտատերերը սովորաբար թարմացնում են իրենց աշխատանքի վայրի մասին իրենց պրոֆիլի տեղեկությունները վեց ամսից մինչև մեկ տարվա ընթացքում՝ իրական փոփոխությունից հետո: Սա նշանակում է, որ եթե ներկայիս միտումը շարունակվի, ապա ընդհանուր թիվը կարող է մոտենալ 1600-ին։
Եթե վերլուծությանն ավելացնենք ռուսաստանյան կազմակերպությունից աշխատանքից ազատվելու, նոր երկիր ավելացնելու՝ առանց աշխատանքի վայրը նշելու կամ Ռուսաստանում զբաղվածության մասին գրառումները ջնջելու մասին գիտնականների պրոֆիլների տվյալները, ապա այդ ցուցանիշն ավելի մեծ է դառնում, ասվում է հետազոտության մեջ։ 2022-2023 թվականների ընթացքում այս կատեգորիային բաժին է ընկել մոտավորապես 900 մարդ։ Այսպիսով, պահպանողական գնահատականներով, մոտ 2500 գիտնական լքել է Ռուսաստանը։
Հետազոտության համաձայն՝ հեռացած բոլոր գիտնականների ամենամեծ արտահոսքը՝ 23 տոկոսը տեղի է ունեցել Մոսկվայի համալսարաններից՝ ՄՊՀ, Տնտեսագիտության բարձրագույն դպրոց, Սկոլկովո, ՄԻՊՏ։
Ռուս գիտնականների միգրացիոն հիմնական ուղղություններից լրագրողները նշում են Իսրայելը, Ուզբեկստանը, Հայաստանը, Ղրղզստանը, ԱՄԷ-ն, Մեծ Բրիտանիան, Ֆրանսիան, Գերմանիան և ԱՄՆ-ը։
