Հիմա ականատեսն ենք լինում, թե ինչպես են տարածաշրջանի երկրները սկսում ձևավորել նոր դաշինքներ
Հայացք մամուլի ակումբում քաղաքական վերլուծաբան Սարո Սարոյանը խոսեց աշխարհաքաղաքական նոր զարգացումների, ՀՀ արտաքին քաղաքական մարտահրավերների մասին:Ըստ Սարո Սարոյանի, Իրաքյան Քրդստանի շուրջ իրադարձությունները, տեղի են ունեցել աշխարհում տեղի ունեցող գլոբալ
փոփոխության` «Իսլամական պետության»՝ որպես համաշխարհային քաղաքականության սուբյեկտի դիրքերի նվազման արդյունքում. «Իսլամական պետությունը» Մերձավոր Արևելքում խնդիրներ լուծող էր, և հիմա փաստորեն նա դուրս եկավ ասպարեզից․այսօր, իմ հաշվարկներով, մնացել է մոտ 1-2 ամսվա կյանք «Իսլամական պետությանը», որովհետև Դերզորից դեպի հարավ ընդամենը մի քանի բնակավայրեր են մնացել։ Հիմա ԻՊ-ը բազավորման համար տեղ չունի, և կարելի է ասել, որ համաշխարհային քաղաքականության մեջ այդ նախագիծը
արանքից դուրս է եկել: Դրա արդյունքում է, որ Քիրքուքում այս խնդիրն ի հայտ է եկել: Մինչև այդ Քիրքուք հասնելու համար իրաքյան ուժերը որևէ հնարավորություն չունեին: Գլոբալ փոփոխություն է տեղի ունեցել,
ԻՊ-ը չի լինելու, տեղը հիմա եկել է ազգերի ինքնորոշման և այդ սկզբունքի վրա հիմնված
մի որևէ սուբյեկտ, որը պահանջներ է ներկայացնում և իր շահերն է առաջ տանում: Քրդական
գործոնն է առաջ եկել: Հիմա ականատեսն ենք լինում, թե ինչպես են տարածաշրջանի երկրները
սկսում ձևավորել նոր դաշինքներ»,- ասաց նա:
«Իրանը կարողացավ օգտվել առիթից, և շատ ավելի առաջ եկավ, երբ «Իսլամական պետության» գործոնը դուրս եկավ ասպարեզից, շատ արագ կողմնորոշվեց և շատ արագ խնդիրը լուծեց»,- ասաց քաղաքագետը:
Անդրադառնալով Հայաստանի՝ Իրաքյան Քրդստանի անկախացման գործընթացում ներգրավվածությանը, Սարո Սարոյանը նշեց. «Հայաստանը սուբյեկտային վարք ցուցաբերո՞ւմ է: Հայաստանը նախորդ բոլոր տարիներին արել է այն, ինչ ասվել է Կրեմլից: Եթե Հայաստանը սուբյեկտ լինի՝ շատ հնարավոր է,
որ կարողանա իր շահերն առաջ տանել: Օրինակ՝ Քրդստանում հայերենը պետական լեզու է, ինչը ևս քաղաքական պատճառներ ունի: Մենք տեղյա՞կ էինք
դրանից, դա մեր միջամտությամբ է եղե՞լ․ ո՛չ:
Բայց փաստորեն կան շահեր արտաքին աշխարհում խաղացող գերտերությունների համար, որի ժամանակ
հայկական գործոնը նույնպես դառնում է ինչ-որ քաղաքականության մաս: Եթե հարց լինի, թե
արդյոք հայկական գործոնը կարող է դիտարկվել աշխարհի արտաքին քաղաքական խաղացողների
կողմից, կարող եմ ասել՝ այո, կարևոր է, իսկ առայժմ նման հավանականություն չկա»,- ասաց նա:
