Մեղուներին ամենաշատը խանգարում են բջջային կայանները, մեղուն կորցնում է ճանապարհը և չի կարողանում վերադառնալ փեթակ
Հայացք մամուլի ակումբում Մեղվաբույծների ազգային միության նախագահ Արմեն Նազարյանը և մեղվաբույծ, դերասան Սերգեյ Դանիելյանը խոսեցին Հայաստանում մեղվաբուծության վիճակից, թե ի՞նչ խնդիրների են հանդիպում մեղվաբույծները, մեղրամթերքի արտադրության և օգտակարության շուրջ:Արմեն Նազարյանը նկատեց, որ Հայաստանի
մեղրի որակն անհամեմատ բարձր է տարածաշրջանում, եթե չօգտագործեն քիմիական հավելումներ.«Մեր մեղվաբույծների մոտ դեռ չի զարգացել մեղուներին գրագետ բուժելու կուլտուրան: Ինչ դեղ գտնում, տալիս են մեղուներին՝ դրանով նաև վնասելով նրանց: Բայց լավ մեղվաբույծի մեղրի որակը շատ բարձր է այն պատճառով, որ Հայաստանում հիմնական ծաղկատեսակները, որոնցից մեղուները նեկտար են վերցնում, բուժիչ են: Մեղվաբուծությունն այստեղ բազմածաղկային է և մեղրի դիաստազային միավորը հասնում է 30-40-ի, դիաստազը մեղրի որակի չափման միավորն է»ասաց
նա:
Սերգեյ Դանիելյանն
էլ Հայաստանում մեղվաբուծության համար առանձնացրեց և՜ լավ, և՜ վատ կողմեր. «Լավ է այն, որ մեղրի համար եկամտահարկ չկա, իսկ վատ է այն, որ չկա սուբսիդավորում պետության կողմից: Իսկ մեղուներին ամենաշատը խանգարում են բջջային կայաններն ու ցանցերը. մեղուն կորցնում է ճանապարհն ու չի կարողանում վերադառնալ փեթակ: Կան նաև մեղուներ, որ փախչում են փեթակներից: Նրանց այդ վարքը հաճախ բացատրել չենք կարողանում»,- ասաց նա:
Անդրադառնալով նրան, թե ինչպես սպառողը պետք է կողմնորոշվի մեղրի որակի հարցում, Սերգեյ Դանիելյանն ասաց, որ հիմա մարդիկ հույսները դնում են վաճառողի բարեխղճության վրա, բայց շատ ավելի լավ կլիներ, եթե արտադրողները լաբորատոր զննման ենթարկեին իրենց մեղրը:
