Ինչպես պաշտպանվել քաղցկեղից. հետազոտություն
Քաղցկեղի հետազոտության համաշխարհային ֆոնդի եւ Ամերիկյան ուռուցքաբանության ինստիտուտի մասնագետները, հիմվելով քաղցկեղ առաջացնող վտանգի ապացուցված գործոնների վրա, հայտնել են, թե ինչպես նվազեցնեն չարորակ ուռուցքների զարգացման հավանականությունը, որոնք հնարավոր է 40 տոկոս դեպքերում կանխել:Գլխավոր կանոններից մեկը մարմնի զանգվածի վերահսկողությունն է: Եթե 10 տարի առաջ ապացուցվել է, որ ճարպակալումը քաղցկեղի 7 տեսակների պատճառն է, ապա այսօր գիտնականները հայտարարում են օնկոլոգիայի արդեն 12 տեսակի մասին, որոնք կապված են ավելորդ քաշի հետ: Խոսքը շագանակագեղձի եւ կրծքագեղձի, ստամոքսի, լյարդի, բերանի խոռոչի եւ ըմպանի, աղիների, լեղապարկի, երիկամների, կերակրափողի, ենթաստամոքսային գեղձի եւ արգանդի քաղցկեղի մասին է:
Մասնագետները խորհուրդ են տալիս նորմալ քաշ պահպանելու համար ավելի շատ քայլել եւ ավելի քիչ նստել: Գիտնականների հաշվարկներով՝ շաբաթական 150 րոպե տեւողությամբ չափավոր ֆիզիկական ակտիվությունը (կամ 75 րոպեանոց առավել ինտենսիվ ծանրաբեռնվածությունը) բավարար է կազմվածքը պահպանելու համար: Ի դեպ, ապացուցվել է, որ հաստ աղիի քաղցկեղից պաշտպանում է հատկապես չափավոր ֆիզիկական ակտիվությունը (ոչ ուժասպառ անող):
Սնվելու առումով գիտնականները խորհուրդ են տալիս առավելագույնս սահմանափակել ֆասթ ֆուդի, ճարպի, օսլայի կամ շաքարի մեծ պարունակությամբ մշակված մթերքների օգտագործումը, հրաժարվել ծխախոտից, ալկոհոլից եւ սննդային հավելումներից:
Բոլոր անհրաժեշտ վիտամիններն ու միկրոտարրերը ստանալու համար անհրաժեշտ է հետեւել բանջարեղենի, մրգերի, ընդեղենի եւ լոբազգիների զգալի պարունակությամբ սննդակարգի:
«Այս խորհուրդները վերցվել են մեր վերջին փորձագիտական հաշվետվությունից եւ փորձագետների անկախ խմբի եզրակացություններից: Վերեւում թվարկված ամեն ինչն իսկապես կարող է ահռելի ազդեցություն ունենալ քաղցկեղի եւ այլ ինֆեկցիոն հիվանդությունների զարգացման վտանգների նվազեցման վրա»,- ասել է պրոֆեսոր Մարտին Ուայզմանը:
