Վրաստանը կդառնա ԱՄՆ-ի կարեւոր գործընկերը, բայց Ադրբեջանը կարող է բարդ գործընկեր լինել Նահանգների համար
Նախագահ Ջո Բայդենի իշխանության գալով Հարավային Կովկասում ԱՄՆ քաղաքականությունն էական փոփոխությունների չի ենթարկվել: Այս մասին այսօր՝ մայիսի 22-ին, Հայ-ամերիկյան առաջին քաղաքագիտական ֆորումի ժամանակ ասաց Քարնեգի հիմնադրամի ավագ գիտաշխատող Փոլ Սթրոնսկին:«Մենք տարածաշրջանում Բայդենի քաղաքականության մեջ էական փոփոխություններ չենք տեսել: Ընդհանուր առմամբ, նույն քաղաքականությունը վարում էին Քլինթոնի, Բուշի, Օբամայի եւ նույնիսկ Թրամփի վարչակազմերը»,- ասաց նա: Սթրոնսկիի խոսքով՝ Հարավային Կովկասը շատ հեռու գտնվող տարածաշրջան է, որի հետ ԱՄՆ-ն այդքան ակտիվ առեւտրային հարաբերություններ չունի, ինչպես մյուս տարածաշրջանների հետ: Ուստի հարաբերությունները պահպանվում են ոչ թե տնտեսական համագործակցության մակարդակում, այլ` ԽՍՀՄ փլուզման հետ կապված 90-ականներից եկող խնդիրների, ինչպիսիք են դիվանագիտությանը ձգտումը եւ աջակցությունը բարեփոխումների իրականացման հարցում:
Սակայն պետք է նկատի ունենալ, որ աշխարհաքաղաքական միջավայրն արագորեն փոխվում է, եւ Բայդենի վարչակազմը կարձագանքի իրադարձություններին, պատերազմին եւ տարածաշրջանը կայունացնելու անհրաժեշտությանը, ասել է Սթրոնսկին: «Ես տեսնում եմ, որ Բայդենի վարչակազմն ավելի շատ ուշադրություն է դարձնում բարեփոխումներին, մարդու իրավունքներին եւ դիվանագիտությանն ուղղված ջանքերին: Բայդենը եւ պետքարտուղար Բլինքենը նշել են դրանց կարեւորությունն արտաքին քաղաքականության մեջ: Բայց ինձ թվում է, որ մենք ակտիվ արտաքին քաղաքականությանը վերադարձ չենք տեսնի, ինչպես եղել է Բուշի օրոք»,- կարծում է փորձագետը:
Նա նշեց, որ ԱՄՆ-ն այժմ ավելի շատ կենտրոնացած է համաշխարհային քաղաքականության ավելի լայն խնդիրների վրա, ինչպիսիք են Չինաստանի մարտահրավերը, Ռուսաստանի հետ հարաբերությունների կառավարումը, ինչպես նաեւ` ներքին խնդիրների, ինչպիսիք են համավարակը, տնտեսական եւ սոցիալական արդարության խնդիրները: «Կարծում եմ, որ ԱՄՆ-ը պետք է շարունակի ներգրավվել Հարավային Կովկասի խնդիրների մեջ, սակայն դա այնքան ուժեղ չի զգացվի, որքան Բուշի վարչակազմի օրոք»,- համոզված է փորձագետը:
Խոսելով տարածաշրջանի մասին՝ Սթրոնսկին նշել է, որ Հայաստանում մոտենում են ընտրությունները, ԱՄՆ-ն հույս ունի, որ երկրում դրական փոփոխություններն ընտրությունների ոլորտում կշարունակվեն: Ըստ փորձագետի` Վրաստանը, ամենայն հավանականությամբ, կդառնա ԱՄՆ-ի կարեւոր գործընկերն ու երկարաժամկետ դաշնակիցը տարածաշրջանում: «Սակայն Ադրբեջանը կարող է բարդ գործընկեր լինել Միացյալ Նահանգների համար»,- հայտարարեց փորձագետը:
