Մարդկային մնացորդներ գնելն ու վաճառելը Մեծ Բրիտանիայում անօրինական չէ. շուկա են հանում մեծահասակների, երեխաների, նորածինների մնացորդներ
Մարդկային մնացորդներ գնելն ու վաճառելը Մեծ Բրիտանիայում անօրինական չէ, քանի դեռ վաճառված մարմնի մասերը չեն օգտագործվում փոխպատվաստման համար: Ուստի Միացյալ Թագավորության սոցիալական ցանցերը վերածվել են առեւտրի կենտրոնների։ Վաճառողները շուկա են հանում մեծահասակների, երեխաների, նորածինների եւ պտղի մնացորդներ, հայտնում է HighTech-ը։Live Science-ը հայտնաբերել է 50 վաճառողների Անգլիայում եւ Ուելսում, ովքեր սոցիալական ցանցերի միջոցով վաճառել են մարդկային մնացորդներ 2020-ից 2022 թվականներին: Որոշները դա արել են փակ խմբերում, մյուսներն էլ բացահայտորեն:
Վաճառողների եւ կոլեկցիոներների համար սովորական է տեղադրել «հետազոտությամբ մաքրված» մարդկային ոսկորների պատկերներ: Այնուամենայնիվ, Live Science-ը հայտնաբերել է նաեւ անդամահատված եւ պղծված մնացորդներ։
Instagram-ում մարմնի մասեր վաճառողներից մեկը հրապարակել է մարդու գանգի պատկեր, որի մեջ եղել են դագաղի մեխեր եւ այն ծառայել է որպես լամպ:
Կայքը հայտնաբերել է մարդկային գանգերով պատրաստված ավելի շատ լամպեր: Եղել են նաեւ ներկված գանգեր:
Մարդկային մնացորդների առեւտուրը ծաղկում է սոցիալական ցանցերում: Meta-ի խոսնակը Live Science-ին ասել է, որ կանոները խախտող բովանդակությունը հեռացվել է ցանցից եւ այդպես էլ կշարունակվի՝ համաձայն Meta-ի քաղաքականության:
Այս հետազոտության ընթացքում Live Science-ի կողմից փաստագրված մարդկային գանգերի եւ ոսկորների մեծ մասը բժշկական կամ անատոմիական նմուշներ են, որոնք կարող են լինել տասնամյակներ կամ դարեր: Մարդկանց մնացորդները սովորաբար վաճառվում են առանց նախապատմության եւ կարող են շրջանառվել առեւտրի ոլորտում տասնամյակներ շարունակ:
Այնուամենայնիվ, երկու դատաբժշկական փորձագետներ լրատվականին հայտնել են, որ հետաքննության ընթացքում հայտնաբերված մարդկային գանգերից մի քանիսը, ըստ երեւույթին, պատկանել են բռնի մահով մահացած մարդկանց: Դատելով լուսանկարներից՝ վաճառվող գանգերից երկուսը հրազենային վնասվածքներ են ստացել։
Մարդկային մնացորդների առք ու վաճառքը հիմնականում անտեսվում է Մեծ Բրիտանիայի գործող օրենսդրությամբ: Յուրաքանչյուր ոք կարող է ունենալ, գնել եւ վաճառել մարդու մարմնի մասեր, եթե ապօրինի ձեռք չբերի մնացորդները եւ չօգտագործի դրանք փոխպատվաստման համար: Սակայն մնացորդները օրինական առումով դրանք չեն կարող պատկանել որեւէ մեկին:
