Տեսանյութ.Ինչպես հաղթահարել ներանձնային կոնֆլիկտը և դառնալ սեփական կյանքի տերը          Տեսանյութ.Հանձնել է այդ չորս գյուղերը և Սյունիքն էլ է հանձնելու. դուք խոսքի, խոստումների համար տալիս եք տարածքի մի մա՞սը       Ամբողջ աշխարհի աչքի առջև ՀՀ-ն վերածվում է ծայրահեղ վտանգավոր ծրագրերի իրականացման գործիքի.Թե ինչու է Երեւանը ձեւացնում, թե չի հասկանում, թե ինչի մասին է խոսքը, մեծ հարց է    

25 ապր 2020 20:57

Թե ի՞նչ տեղի կունենա ընտանիքում, որտեղ 24 ժամ միասին են, կախված է յուրաքանչյուրից

Կորոնավիրուսի համավարակի հետևանքով երկրում ստեղծված իրավիճակի, հանրության շրջանում ի հայտ եկած հոգեբանական հարցերի շուրջ Hayacq.com-ը զրուցեց հոգեբանական գիտությունների թեկնածու, դոցենտ Սոնա Հարությունյանի հետ:

-Խոսենք կորոնավիրուսի համավարակով պայմանավորված հանրության շրջանում ի հայտ եկող հոգեբանական խնդիրների մասին:
 
-Սկզբնական շրջանում ակտիվ կենսակերպից մեկուսացման ռեժիմին անցնելու հարմարման դժվարություններն էին, նաև տագնապի դրսևորումներ, որոնք, ի դեպ, բնական են, նորմալ են:
Ցանկացած փոփոխություն առաջացնում է անհանգստություն,  որը կարող է կարգավորվել տվյալ իրավիճակի մասին գրագետ ինֆորմացիա ստանալով: Եվ այդպես էլ եղավ: Հակառակ դեպքում, տագնապը կարող էր վերածվել խուճապի: 
Կարծում եմ համավարակով պայմանավորված մեկուսացումը հոգեբանական դրական կողմ ունեցավ` զարգացնելով համբերատարություն, կարգապահություն, ընտանիքին ավելի շատ ժամանակ հատկացնելու, երեխաների հետ շփվելու հնարավորություն, նաև ինքներս մեր ժամանակը կառավարելու ինքնուրույնություն, երբևէ բացթողնված հետաքրքրությունները բավարարելու անհրաժեշտություն (գիրք կարդալ, ֆիլմ դիտել, ստեղծագործել և այլն): 
Սոցիալական անմիջական շփումների սահմանափակումը ինքնակենտրոնացման մարտահրավեր նետեց. սեփական ներաշխարհը ճանաչելու, այնտեղ թաքնված խնդիրները վեր հանելու, հաղթահարելու, ինչու չէ` նոր ռեսուրսներ բացահայտելու ուղղությամբ:  
 
-Հնարավոր համարո՞ւմ եք այն, որ երկար ժամանակ մնալով տանը ընտանիքներում մեծանան կոնֆլիկտները։

-Հնարավոր է նաև ամրապնդվեն հարաբերությունները: Թե ի՞նչ տեղի կունենա ընտանիքում որտեղ 24 ժամ միասին են, կախված է յուրաքանչյուրից, նաև հարաբերությունների և՛ ներկայիս, և՛ անցյալում ունեցած որակից: Եթե նախկինում կուտակված, չլուծված խնդիրներ կան, ապա հնարավոր է այսպիսի պայմանները նպաստեն դրանց ակտիվացմանը և «պոռթկմանը»: 
Մյուս կողմից, չի բացառվում, որ այս օրերի զրույցները, չհասկացված հարցերի լուսաբանումները օգնեն ընտանեկան մթնոլորտի դրականացմանը, հարաբերությունների վերագնահատմանը: 
 
-Ինչպե՞ս պայքարել նեգատիվ դրսևորումների դեմ:

-Բացասականը նվազագույնի հասցնելու համար անհրաժեշտ է պլանավորել օրը, պահպանել որոշակի ռեժիմ (քնելու, սնվելու, ֆիզիկական ակտիվության), գտնել հաճելի զբաղմունքներ, հաճախ օգտակար է որևէ նախասիրության ակտիվացումը, առավել ևս, եթե նախկինում ցանկացել եք, բայց ժամանակը չի բավականացրել այն իրագործելու համար: Նաև ցանկալի է զերծ մնալ տեղեկատվությանը անընդհատ հետևելուց:  
 
-Արդյո՛ք կարելի է պնդել, որ համավարակը ստիպել է մարդկանց  հեռանալ իրարից ոչ միայն ֆիզիկապես, այլև հոգեբանորեն:

-Հնարավոր է, այո՛: Ժամանակավոր հեռացումը օգնում է տեսնել և գնահատել այն, ինչը սովորական էր դարձել, կամ գուցե մոտիկից նկատելի չէր: Եվ այս ժամանակահատվածում ընթացող վերաիմաստավորումը որակական նոր մակարդակի մեկնարկ կապահովի մարդ-մարդ հարաբերություններում:
 
-Երկարատև կարանտինային այս անբնական վիճակից հետո արդյո՞ք հեշտ կլինի հարմարվել բնականոն կյանքի ռիթմին:

-Ինչպես գիտենք, ցանկացած փոփոխություն, ժամանակ է պահանջում մարդուց՝ հարմարվելու համար: Այդպես կլինի նաև այս փուլից բնականոն առօրյային անցնելու ընթացքում: Իհարկե, ոմանք հեշտությամբ, արագ կհամալրվեն ակտիվ կենսակերպին, ոմանք` ավելի դանդաղ, գուցե որոշ դժվարություններով: Դերակատարում կարող են ունենալ անձնային առանձնահատկությունները, գործունեության հանդեպ վերաբերմունքը, հոգեվիճակը, այս փուլից ձեռքբերված գիտելիքները, վերլուծությունները, եզրակացությունները: 

Մեկնաբանություններ


Համընկնող լուրեր