Փաշինյանի՝ Արցախում արված հայտարարությունը, թե «Արցախը Հայաստան է և վերջ» հեչ էլ վտանգավոր չէ
Ադրբեջանի հարցերով փորձագետ Տարոն Հովհաննիսյանը ՀՀ վարչապետ Նիկոլ Փաշինյանի՝ Արցախում արված հայտարարությունը, թե «Արցախը Հայաստան է և վերջ», վտանգավոր չի համարում: Նա այսօր լրագրողների հետ զրույցում Ադրբեջանի՝ այս հայտարարության վերաբերյալ արձագանքը որակեց որպես ագրեսիվ:«Հայկական կողմից նման հայտարարություններ միշտ եղել են՝ նաև նախկին իշխանությունների կողմից: Սա չի նշանակում, որ ՀՀ-ն տապալում է բանակցային գործընթացը, սա նշանակում է, որ մենք թե՛ մշակութային, թե՛ պատմական, թե՛ բնակչության առումով մեկ ենք: Սա միայն քաղաքական հայտարարություն չէր»,- ասաց նա:
Հովհաննիսյանի կարծիքով՝ վարչապետ Փաշինյանի հայտարարությունը չի խոսում այն մասին, որ Հայաստանը հրաժարվում է բանակցային գործընթացից կամ խնդրի խաղաղ կարգավորումից: Նրա խոսքով՝ Ադրբեջանն իրավունք չունի խոսել ագրեսիայից, քանի որ իրենք են հենց ագրեսիա տարածողը:
«2018 թ.-ին Ադրբեջանի նախագահը հայտարարեց, որ Զանգեզուրը, Գոյչան՝ Սևանը, Երևանն Ադրբեջանի «պատմական հողերն են» ու մի օր վերադարձնելու են: Այսինքն՝ սա հավակնություն էր ՀՀ տարածների նկատմամբ: Նման հայտարարություններից հետո իրե՞նք են հայտարարում, թե Հայաստանը փորձում է տապալել բանակցային գործընթացը: Իրենք նաև հայտարարում են, որ խնդիրն ունի մեկ կարգավորում՝ Ղարաբաղը պետք է լինի Ադրբեջանի կազմում»,- ընդգծեց Հովհաննիսյանը:
Վերջինս հիշեցրեց, որ դեռևս 1988 թ-ի փետրվարից Արցախը գնում է ինքնորոշման ճանապարհով, իսկ արցախյան պատերազմը հարկադրված էր և անկախության ու ինքնորոշման համար պայքարում Արցախը հաղթեց:
«Արցախյան հակամարտության մեջ բանակցային հիմնական երկու կողմ կա՝ Արցախ ու Ադրբեջան, իսկ 3-րդ կողմը՝ Հայաստանը, Արցախի անվտանգության երաշխավորն է: Ագրեսիվ կողմը ադրբեջանական կողմն է, հայկական կողմի հայտարարություններն ագրեսիայի միտում չունեն»,- հավելեց նա:
Ադրբեջանագետը շեշտեց, որ Ադրբեջանն է հրաժարվել հրադադարի հետաքննության մեխանիզմների տեղադրումից, ինչը ևս մեկ անգամ փաստում է, որ նրանք խուսափում են, քանի որ իրենք են հրադադարը խախտում:
«Նշանակում է, որ համաձայն չեն, որ ֆիքսվի, որ իրենք են ագրեսոր, իրենք են կրակում, իսկ ՀՀ-ն ու Արցախը երբեք նման մեխանիզմների դեմ չեն եղել: Մենք առաջինը չենք կրակում, մենք պատասխանում են՝ զուտ անհրաժեշտ պաշտպանության շրջանակում, երբեմն էլ՝ անհամաչափ: Այս պարագայում պարզ է դառնում, որ խաղաղ կարգավորումն Ադրբեջանի դիրքորոշման պատճառով է անհնար դարձել»,-ընդգծեց Տարոն Սիմոնյանը:
Ինչ վերաբերում է սահմանային իրավիճակին, նա նշեց, որ որևէ շեշտակի փոփոխություն չկա: Նրա գնահատմամբ՝ այսօր Ադրբեջանը փորձում է լարել իրավիճակը Նախիջևանի, Տավուշի ու Արցախի ուղղությամբ:
