Տարիքի հետ կարևորվում է ոչ թե հաճույքի, այլ բավարարվածության զգացումը
Hayacq.com-ի hարցազրույցը Սթրեսի և Ցավի կառավարման կենտրոնի ղեկավար, հ.գ.թ., դոցենտ Սոնա Հարությունյանի հետ:-Տոնը հոգեբանական տեսանկյունից ի՞նչ նշանակություն կարող է ունենալ
անձի համար:
-Տոները մի շարք կարևոր նշանակություն ունեն. նպաստում են անձի,
նրա արժեքային համակարգի, աշխարհայացքի ձևավորմանը, ազգային արժեքների յուրացման և
ամրապնդման հեշտ և արդյունավետ միջոց են, և իհարկե, ուրախանալու, լավ տրամադրության,
համախմբելու առիթ: Տոնը իրադարձություն է, որը պարգևում է դրական հույզեր, լավատեսություն,
միասնականության զգացում, ներդաշնակ հարաբերություններ, նորի սպասում, երջանկության
զգացում: Այլ կերպ կարող ենք ասել, որ այն կենսական նշանակություն ունեցող պահանջմունք
է անձի համար:
-Իսկ տոների ավանդույթը արդյո՞ք էական դեր ունի ընտանեկան մթնոլորտի
համար:
-Ընտանիքում կազմակերպվող տոները էապես ազդում են ընտանեկան մթնոլորտի
վրա, նպաստում համախմբմանն ու փոխհասկացմանը, մտերմացնում ընտանիքի անդամներին, հիմնվելով
դրական հույզերի և համատեղ գործունեության վրա: Տոնի բովանդակությունն իր հերթին արտացոլում
է ընտանիքի արժեքները: Եվ եթե ուշադիր լինենք, կնկատենք, այն, թե ինչպես կկազմակերպենք և կանցկացնենք տոնը մեծապես կախված
է տոների հանդեպ մեր վերաբերմունքից, որի ձևավորմանը
նպաստում է հատկապես ընտանիքը:
-Տարիքն ինչպե՞ս է անդրադառնում տոնի ընկալման կամ տոների հանդեպ
վերաբերմունքի վրա:
-Երեխաներն առավել անմիջական են, լիարժեք ուրախանում են, երջանկություն
են զգում տոներից: Տարիքին զուգահեռ մեծանում է վերահսկողությունը հուզական ասպեկտի
վրա, և գերակշռում է ռացիոնալը: Կարծեք, տարիքի հետ կարևորվում է ոչ թե հաճույքի, այլ
բավարարվածության զգացումը: Հաճույքն անմիջականորեն որևէ իրավիճակից, իսկ բավարարվածությունը`
իրավիճակի ռացիոնալ գնահատականից առաջացած դրական ապրում է: Պատահական չէ, որ հույզերի դրական հագեցվածությունը օգնում է երեխային
առավել հեշտությամբ յուրացնել և հիշողության մեջ ամրագրել իրադարձությունը, տոնի հոգեբանությունը:
